金木水火土，何者價最高？答案當然係土啦，事關土地從來都係財富之源，有土有地先至係飛黃騰達嘅王道。如果土地唔係咁重要，香港嘅頂級富豪都唔會個個都係地產商。
當你有咗土地，你就可以起屋，賣屋或者租屋都有利可圖。問題係，如果你有土地而長期空置，你會唔會蠢過隻豬呢？特首候選人唐英年雖然一頭豬相，都唔會蠢到空置土地啦，反而識得諗計「掘深咗」，額外僭建咗一個地下宮殿。
之但係非常可惜，特區政府盛產敗家仔，長期空置土地咁蠢嘅事真係存在o架。○八年審計署發表報告批評，產業署浪費土地資源，事隔三年幾嘞，居然毫無改善，產業署話仍然需要兩至三年時間先至可以重新審視。
被浪費嘅土地資源分別係北角七海商業中心、創業商場以及一洲國際商場三個舖位，先後於一九八○年、一九八二年同一九九四年轉售畀香港政府，原本預留作為港鐵車站出入口範圍，但係政府接收三個舖位用地之後丟空至今，其中北角七海商業中心物業空置超過三十年。○八年經過審計署揭發之後，立法會議員猛烈抨擊，產業署先至向港鐵查詢，獲知對方無意使用三個預留舖位作為出入口。
喂，香港寸金尺土，你試下將三個舖位畀功夫茶用嚟收租吖，咁多年加加埋埋肯定十分和味，未必夠錢買一架私人飛機周遊列國，之不過去租番一間「深圳禮賓府」應該綽綽有餘。當然啦，功夫茶絕對唔會學似曾蔭權咁樣佔人便宜，一定會交足市價租金，費事受人恩惠唔知幾時投桃報李吖嘛。
難怪立法會議員王國興批評產業署浪費土地幾十年係「離晒大譜」，政府預留土地用途寫得太死，自我綑綁手腳，最終搞到今時今日嘅局面。
北角七海商業中心嘅預留範圍好少少，現已編配畀食物環境衞生署使用。新辦公室面積二百平方米，將會作為署方轄下環境衞生部第三行動科及食安中心食物標籤小組少量豁免辦事處，預計下月啟用，並獲豁免租金使用。至於其餘兩個妾身未明嘅空置舖位，家陣最主要嘅作用當然係養老鼠啦。
最近由於曾蔭權貪腐醜聞不絕，大家經常聽到嘅熱門詞彙係「官商勾結」。計功夫茶話齋，浪費土地資源算得上係另一種利益輸送，可以叫做「官鼠勾結」，明益老鼠享用面積龐大嘅無人地帶。
煲呔曾講過，民望於我如浮雲。對於產業署而言，為官之道大概係咁，土地於我如糞土。既然係咁，產業署幾時再浪費土地資源唔該通知一聲，等功夫茶去霸佔官地都好吖！