捲入「富豪門」醜聞的煲呔曾，誠信已然破產，如此一個縮骨治港的香港仔，再如何有效地管理香港？煲呔曾無論如何砌詞狡辯，顧左右而言他，也難擺脫貪腐這恥辱的標籤！
事到如今，煲呔曾愈辯愈黑，愈描愈髒，又岔開正題，說要成立甚麼「特別委員會」，以檢討行政長官、問責官員及行會成員的利益申報制度，煞有介事邀請退休大法官李國能主持委員會。嗱嗱嗱！呢啲就叫整色整水，此地無銀，企圖把焦點分散，之不過，由於佢貪得無厭，食相饕餮，太過難睇！
有議員從「身為天主教徒」的角度指摘煲呔曾沒有天主教徒最基本信念——仁愛，唔識關顧窮人，只為自己退休鋪後路，過奢華生活。講真，煲呔曾位極人臣，年薪過四百萬，多過美國總統奧巴馬，只係佢唔知足，推翻「高薪養廉」神話，在佢身上，見證人性沒有最貪，只有更貪！
有人形容，為政貪權，也就像一頭驢，當了科長，看見前面有根叫處長的紅蘿蔔……於是一輩子像一頭驢，在仕途上推磨。當然，煲呔曾胃口奇佳，一頓午飯輕易𡁻咗二萬多元，拍賣「私藏」紅酒，閒閒地都過二百萬，怎會看上一根紅蘿蔔？
老朽讀高陽《紅頂商人》，從胡雪巖身上得到啟示：上半夜想想自己，下半夜想想別人。咁就唔會凡事自以為是，同家人、朋友嘅期望有落差矣！煲呔曾七年一覺特首夢，贏得香江「和曾」名！衰收尾，嗚呼哀哉！