特首選戰變數多，日前高調話要考慮參選嘅立法會主席曾鈺成，尋日終於決定唔玩，但有傳佢其實仍有後着。有商界中人推測，唔排除佢有機會做下屆政務司司長（CS），因為話佢做過立法會主席，同各黨派講數都易啲。呢位商界人士仲話，新政府可能會加設一個政務司副司長職位都唔奇，由公務員梯隊中擢升，就可取長補短咁話。
講到財政司司長嘅人選，商家都樂意玩「估領袖」遊戲，盛傳滙豐銀行亞太區行政總裁王冬勝（Peter）好有機會做財爺，佢縱橫金融戰場多年，食力毋庸置疑，咁啱佢今年十一月下旬剛滿六十歲，即係夠鐘退休，加上有傳佢亦唔抗拒跳入官門，言下之意，都唔係冇機會喎。
至於其他局長人選，呢位商界人士估計，運輸及房屋局局長鄭汝樺、民政事務局副局長許曉暉有望留低，但政制及內地事務局局長譚志源就未必有得留低喇。