政情：洪為民日游30個塘
馬會跑馬地會所泳池向來好多名人幫襯，亦曾爆出名人爭執事件，原來從事資訊科技界行業嘅菁英會主席洪為民（Witman）都經常喺馬會泳池出沒，亦見過涉及爭執風波嘅名人。Witman自稱係游水迷，每日要游三十個塘先至安樂，正因為游得太多，泳褲損耗率好高，曾試過上水後發現臀部涼浸浸，原來泳褲穿咗個窿，所以要買定四至五條泳褲，以便隨時更換。
Witman都係資訊科技界選委之一，講起新民黨葉劉淑儀參選特首唔夠票入閘，佢就話自己都算識得葉太，因為葉太喺○七年參加立法會港島區補選時，佢都有幫手助選，如今葉太冇要求佢提名，可能唔記得咗佢，但佢唔會擺喺心度喎。不過，問佢會否主動提名葉太時，洪為民就話未必，因為現時都睇唔透邊個最好，加上局勢每日都變，無謂押晒喺一個人身上喎！