政情：黃容根開fb大陣仗
漁農界立法會議員、大埔區議員黃容根經常有笑料，試過以前曾經因為其區議會寶雅選區對開行人路安裝咗設計特別嘅欄杆，佢於是出海報提醒一眾男士如果跨越欄杆過馬路時就要「小心下體」。
根哥日前又獻新猷，出咗一張海報，以「根叔有FACEBOOK啦！」為題，通知大家佢設立咗社交網站facebook（fb），海報中嘅根哥顯得既雀躍又威風。
根哥喺海報仲呼籲市民如果有啲乜嘢想同佢講、對社區有啲乜嘢期望、又或者有邊啲地方需要維修，都可以add佢做朋友，寫低大家所想喎。雖然因為開咗fb而出張海報有啲誇張，或者大家見到會笑咗出嚟，但另一方面反映根哥係有啲計嘅，唔似得有啲議員做咁多年都係墨守成規，毫無創意，淨係睇根哥可以連任咁多屆區議員，相信可睇到箇中原因。