政情：林建康舉家食盡獅城
愛沙尼亞共和國駐港名譽領事林建康（Matthew）同太太黃寧艷都係城中食家，早前舉家遊獅城，餐餐食鮑魚、生蠔及生猛海鮮，林太更帶隊橫掃星級餐廳。林太娘家喺新加坡，所以佢熟晒地頭，最愛位於濱海灣金沙酒店嘅「Sky on 57」，餐廳由「新加坡御廚」郭文秀（Justin Quek）主理，吸引唔少政要及貴賓幫襯。
林太點名柯打招牌福建麵、大蝦Laksa、海南雞飯及黑胡椒龍蝦，兩位公子食到舔舔脷，食完仲捉埋Justin影相留念添。眾人再拉隊試另一人氣餐廳Iggy's，呢間餐廳來頭不小，曾被英國美食雜誌評為「亞洲Top 5餐廳」之一，Matthew大擦天婦羅、極品和牛及生蠔，聽見都流晒口水。
玩完呢轉，林家復活節又出門嘞，地點係澳洲悉尼及黃金海岸；暑假再坐郵輪玩盡地中海。林太話，希望大仔孝勇及細仔孝政多行萬里路，放眼世界，認真係廿四孝媽咪。