政情：建制派保曾 死路一條

煲呔曾接受富商邀請乘搭豪華遊艇、坐私人飛機遊布吉、平租深圳豪宅，仲要死口唔認有利益輸送。一向保皇嘅建制派同功能組別議員竟然膽敢包庇煲呔曾，簡直係與民為敵。好似民建聯一開始就護短，又撐煲呔曾未必要公開交代，只需要自行評估有關場合適唔適合就可以。該黨主席譚耀宗仲要懶幽默咁話︰「唔覺得私人飛機好好坐，好危險o架！」

譚Sir獻屎橋 認同卸責

雖然譚Sir日前「改邪歸正」認同煲呔曾要到立法會交代事件，但佢尋日竟然又話煲呔曾宣布成立委員會重新審視高官嘅申報機制，可以對日後嘅高官有更清晰嘅規管，等於認同煲呔曾卸責。譚Sir仲建議煲呔曾放棄租住深圳東海花園豪宅，以為就可釋除疑慮，但其實正一係屎橋。依家唔係住唔住嘅問題，而係有冇曾商勾結，利益輸送。唔通啲賊偷咗嘢，賠番錢就唔使受法律制裁？

民建聯與其諗埋呢啲屎橋，不如認真聽吓民意，喺周四答問大會認認真真去質詢煲呔曾接受富商款待嘅來龍去脈好過啦。如果冇證據嘅話，不妨揸住《東方日報》及《太陽報》連日來嘅獨家報道，當面質詢煲呔曾囉，有相為證，不容抵賴。如果佢哋唔識死，仲係盲目護短，堅持包庇煲呔曾，等於與民為敵，九月立法會選舉只有死路一條。正與邪只係一念之間，想行生路定死路，自己諗清楚啦！