中環出更：張王幼倫東京擦魚生
嘉頓新抱張王幼倫貴為名媛兼珠寶設計師，每逢出席公開場合都明艷照人，卓妮日前喺一個活動上，見到以中式旗袍配legging現身，驟眼睇看似好平凡，但細看之下，見到佢戴住一對閃令令耳環、手錶及戒指，即刻令人眼前一亮，氣質盡顯，原來所有首飾都係張太嘅自家設計。
唔擔心輻射
講起放假外遊，張太話啱啱喺早前假期同囝囝去咗日本東京大啖食刺身魚生，大飽口福。卓妮問佢有冇擔心輻射，佢就笑笑口話，身邊唔少朋友一早已經解禁，放膽照去日本，到依家都安然無恙。講到今次東京之旅，張太同囝囝四圍去搵食，遇到有啲高質素嘅餐廳，都一樣好難訂位，證明當地經濟都唔係想像中咁差喎。
不過，講到女性至愛嘅購物活動，張太就話冇乜點買嘢，因為日圓高企唔抵買，而且日本服裝size偏細，唔啱身材高挑嘅佢喎，所以都係食多兩片魚生好過喇。