中環出更：肥亨坐免費機暗寸貪「曾」冇申報
國泰航空日前邀請咗一批嘉賓去美國西雅圖嘅波音飛機公司工廠接收新飛機，長期幫襯國泰嘅中策集團主席馬時亨（肥亨）同太太王培琪都有獲邀湊熱鬧，行程緊湊。
獲邀遊西雅圖
曾任商務及經濟發展局局長嘅肥亨話，自從離開政府之後，國泰曾多次邀請佢出席活動，但佢都冇應承，今次撞啱佢同太太都得閒，加上有廿年冇去過西雅圖，所以先答應走一轉。佢話：「我哋呢啲人就邀請得，因為唔使申報嘅！」莫非佢暗寸煲呔曾接受富豪提供嘅海陸空款待後要申報利益？
今次四日行程中，肥亨夫婦仲參觀咗當地嘅航空博物館，內裏擺放好多珍貴模型，包括已倒閉嘅泛美航空飛機組件，令到肥亨憶起唔少往事。佢話，當年廿四歲仔就要隻身飛到紐約工作，搭嘅就係泛美航空，可惜當年冇相機喺身，想影張相留念都冇，所以今次難得重遇泛美，狂擺甫士影到夠。
肥亨自言因工作關係，經常都要周圍飛去開會，好多時都係坐國泰商務客位，但短途都唔介意坐吓經濟位。今次國泰安排嘉賓回程返港試坐新機，本來獲安排坐商務客位嘅肥亨，專登降格去試坐「特選經濟客艙」，佢笑言自己咁肥都唔覺得逼狹，質素拍得住商務位喎。
卓妮