霸佔官地ＢＢＱ　官僚差過做實Ｑ

功夫茶因乜事幹介紹旅遊景點？莫非受到曾蔭權「玩遍東南亞、歎盡海陸空」感染，忽然之間遊興大發？非也非也，功夫茶即使想去遊山玩水，都冇富商願意提供超級遊艇同私人飛機啦，就近去深圳玩又冇得入住面積萬呎嘅「極豪禮賓廉租屋」，想玩得過癮少少都冇辦法。功夫茶之所以提到烏溪沙，其實係受到一個問題困擾，成日話香港地皮矜貴，搞到租金冠絕全球，點解官地經常被霸佔呢？

即係咁，烏溪沙渡頭村沙灘四年前出現一個無牌經營嘅燒烤樂園，每逢周末假日就人頭湧湧，一個二個「燒雞翼、我鍾意食」。ＢＢＱ都唔止喎，霸主仲提供麻雀耍樂，日租一百元就可以噼噼啪啪打雀論英雄。至於汽水啤酒，當然長賣長有。

四年以來燒烤樂園不斷擴張營業，之但係鄰近村民甚至外來遊人就慘嘞，自然美景受到蹂躪，空氣充滿煙熏味道，寧靜環境變得嘈吵。以前係，落霞與孤鶩齊飛，秋水共長天一色；家陣係，村民與遊人齊悲，雀友做牌清一色。

面對環境丕變，村民四年來多次向地政總署同食環署投訴，你估官老爺有乜反應吖嗱？反應就係，全無反應。

嚴格而言又唔算全無反應嘅，因為地政總署承認事件屬實，的確有人非法佔用官地經營燒烤場，問題係署方只係記錄在案，乜鬼管制行動都冇，不負責任嘅態度十足十就係唐英年金句：吊吊揈。

提到唐英年，大家一定諗到地下掘窿唔覺意「掘深咗」事件，僭建唐宮算唔算霸佔官地呢？照道理講，無論地面抑或地底都係官地，唐唐當然亦係霸佔官地嘅惡爺。

烏溪沙竟然任人霸佔官地ＢＢＱ，功夫茶真係想問一問曾蔭權，港產官僚嘅管治水平係唔係連看更伯伯或者實Ｑ哥哥都不如呀？你試下擅闖民居燒雞翼打麻雀吖，實Ｑ一定唔會記錄在案就算鬼數，分分鐘施展龍爪擒拿手將你一嘢掟出街，唔似得地政總署咁懶懶閒，四年來容許官地淪陷。

唉，其實再問曾蔭權都係多餘，人哋都已經不顧身份傍住富商黐飲黐食，唔理大便宜定係小便宜都舔到盡，腦裏面淨係識得諗私人利益㗎咋，對於公眾利益點會浪費精力去處理吖。

香港淪落到咁嘅田地，官僚差過做實Ｑ，功夫茶有少少懷疑，禮賓府遲早都會被霸佔變成燒烤樂園，政府總部開枱打麻雀都得。