一次污，兩次穢，久而久之，就如古人所說：如入鮑魚之肆，久而不聞其臭，亦與之化矣。煲呔曾「貪遍省港澳，趙勻海陸空」，睇怕去到呢個境界，去到「化境」，再貪落去，乜都「問心無愧」啦！
證據鑿鑿，仲要惡人先告狀，話自己一直重視操守，呼籲外界勿以陰謀論視之，咁樣批評佢，令佢「既痛心又傷心」！曾生，家陣係乜嘢世界吖？香港史無前例出咗你一個咁嘅特首，依老朽話，夕陽政府已步入「恐懼年代」。
老朽每日展讀本報要聞，見到煲呔曾嘅醜行愈揭愈多，講真，呢個城市真係已經死亡！老朽活了一把年紀，竟然感到自己活着的社會——令我恐懼！因為呢個社會，已經沒有所謂好人壞人，只有危險分子！
煲呔曾，唔好再侮辱港人嘅智慧啦！香港出了個咁危險嘅特首，應該痛心又傷心嘅係我哋大眾市民啊！你嘅「身份危機」肯定跳落維港水也解唔甩！
挪威學者拉斯．史文德森在《恐懼的哲學》指出，恐懼文化是一種信任缺席的文化，而這會嚴重影響人們之間的相互關係，原因在於，信任是將人們聯繫在一起的「社會黏合劑」。
煲呔曾，你一日歎盡呢份工、揩盡油水，大部分市民都活多一日在恐懼中，沒有人會信任你。網民惡搞「我會辭咗呢份工」倒是老朽心聲，早些下台，積點陰德吧！