政情：唐唐潑學生冷水反被寸
本港一直面對人口老化同貧富懸殊兩大問題，社會企業無障礙的士「鑽的」尋日就搞咗個意念創作比賽，一班中學生要諗計解決上述兩大問題。其實班中學生構思嘅社企計劃都幾有諗頭，但被出席嘅特首候選人唐英年（唐唐）大潑冷水，結果被富有社會福利工作經驗嘅亞洲金融集團總裁陳智思（Bernard）寸佢好似做老闆咁對待學生見工。
話說有學生建議寫一本關於香港三十至七十年代嘅書籍，賺到嘅錢會幫助啲公公婆婆裝設平安鐘，點知唐唐就質疑計劃嘅持續性，問裝完平安鐘之後嘅行政費邊個畀喎，搞到個同學仔都唔知點答好。
另一個男同學就提議搞間專幫後生仔搵工兼培訓嘅獵頭公司，點知唐唐就話獵頭公司做埋培訓，成本一定好貴，又質疑成間公司好似變咗勞工處咁。
Bernard聽到就即刻幫班學生反寸唐唐一句：「依家好似見工咁喎！」其實班學生都係提出講個意念啫，細節可以慢慢研究，唐唐何必大潑冷水呢？婚外情同大宅僭建細節又唔見佢交代得咁清楚！