本報日前揭發三名立法會議員違反規定，喺立法會停車場停泊超過一輛車嘅限制，即同一時間霸兩個車位，涉及議員包括中總代表黃宜弘、工程界何鍾泰及民建聯葉國謙，被批評博懵攞着數。立會秘書處尋日就向全體議員及職員發出文件，提醒每名議員喺任何時間只可停泊一輛車，冇人有例外。
有份「超泊」嘅何鍾泰尋日就喺電台節目解釋，因為有時需要辦事處職員揸車送文件到立法會畀佢，所以就多泊咗一輛車，但佢強調每次都會同保安交代，唔涉及濫權喎。不過，立法會秘書處講到明，除咗議員外，任何人士應邀到立法會大樓，只獲准使用停車場訪客泊位，而且泊車時間以四小時為限，亦不准通宵停泊。即係話，唔係交代一聲就得，如果係得，保安都失職。
其實以前舊立法會大樓都試過有議員違泊，秘書處又係出份文件提醒吓議員就算，結果搬到新大樓後又故態復萌，睇嚟有關方面要嚴格執行，否則如果個個議員都係咁，真係多多車位都唔夠泊喇。