政情：「曾朋友」齊齊等授勳
煲呔曾「曾商勾結」醜聞日日新鮮，今鋪水洗都唔清，雖然未知廉政公署幾時拉人，但外界已經諗多一步，關注煲呔曾喺「退伍」前由佢決定嘅「最後的勳章」，會否向「曾朋友」論功行賞。其中最近熱爆嘅三個「曾朋友」，包括東海集團主席黃楚標、重慶富商張松橋等，相信可以排定隊等煲呔曾「報恩」，所以呢份授勳名單究竟涉及幾多延後利益，大家真係要金睛火眼(目及)到實至得喇！
《東方日報》及《太陽報》連日獨家踢爆煲呔曾接二連三接受富商秘密款待，先乘坐張松橋嘅超豪私人飛機直飛泰國布吉度假，日前又坐另外幾名富豪嘅億元豪華遊艇過澳門遊玩兼過夜，前日再畀我哋踢爆豪裝「退伍」後近萬呎嘅深圳「禮賓府」，原來係黃楚標旗下嘅深圳東海花園複式單位，豪花過千萬裝修，月租只係八萬多元，真係話呢個唔係超筍價都冇人信。
零成本符合縮骨性格
煲呔曾可以明目張膽「曾商勾結」，其實全賴一班出錢又出力招呼佢上山下海嘅「曾朋友」，按常理亦自然得到煲呔曾嘅嘉許厚愛。不過，以煲呔曾小器兼縮骨嘅性格，要對等招呼番呢班「曾朋友」嘅機會近乎係零，睇怕會用零成本嘅授勳機會大啲。眾所周知，當局每年都有一個由政務司司長做主席，共有十多人嘅授勳評審委員會，頒授勳銜表揚對香港有重大貢獻嘅社會人士，最後由煲呔曾拍板。
不過，有明眼人每年睇個授勳名單，發現近年都有好多「政治酬庸」，好似有「煲呔針」稱號嘅鄭經翰，突然喺二○一○年獲頒金紫荊星章，即時引起全城嘩然，依家張松橋、商人劉鑾鴻、以及曾於○八年獲太平紳士嘅黃楚標三個「曾朋友」，最近分別喺海陸空方面都氹得煲呔曾咁開心，相信煲呔曾加多幾個人入授勳名單絕對做得出，所以話佢哋唔係今年金紫荊星章嘅大熱人選都冇人信啦！
話時話，究竟煲呔曾最後係咪會論功行賞呢班「曾朋友」，相信佢已經卸任「冇眼睇」，但留下嘅蘇州屎，連累新一屆政府被市民鬧爆，認真好帶挈！