中環出更：陳正欣打造名錶專門店
活躍於社交界嘅前鐘錶業總會主席、百利建董事總經理陳正欣（Daniel），係卡地亞中國區代理，時尚潮人嘅形象深入民心。卓妮早前見Daniel隻身巡舖，認真勤力。Daniel喜上眉梢話，嚟緊Van Cleef & Arpels、Jaeger-LeCoultre、Hermes等名牌將同佢合作開展內地市場，多年建立名牌專門店嘅信譽受到肯定，難怪佢咁開心喇。
卸任後全力發展內地市場
Daniel十幾年前卸任鐘錶業總會主席後，就全力發展內地市場，至今已有近三十間名牌專門店，仲創辦時尚網站「愛奢網」，確係引領內地風尚潮流嘅先驅者。佢對瑞士人一絲不苟嘅做事態度極為欣賞，認為香港應由教育着手，將來實有潛質成為「東方瑞士」喎。至於Daniel自己對名錶嘅口味，睇戴喺手上嘅靚錶就知道，係飛機錶系列，剛強男人味十足。