中環出更：楊華勇結婚花車古董味濃
三月下旬除咗係特首選舉外，仲係菁英會常務副主席楊華勇（Johnny）嘅大婚好日子，佢近期忙於籌備婚禮，又要兼顧公司生意，真係周身唔得閒。卓妮周三喺中環ifc停車場遇見Johnny，見佢泊好車急步離開，但後來又突然折返，原來漏咗嘢未攞。不過，睇真啲佢部靚車，原來係紫色仿古車，車身立立令，有格調又夠搶眼。
卓妮事後問番新郎哥Johnny，佢話架車○三年購入，品牌係日本光岡（Mitsuoka），車價幾多就唔想講喎。不過，卓妮自己查到，部仿古車型號係Galue II DX 3.0，汽缸容量達三千C.C.，夠晒好力，當年車價近五十五萬港元。
Johnny鍾情仿古車，原因係鍾意佢哋嘅外形夠古董味，但內籠就絕不「老爺」，有齊現代化嘅設備，可謂宜古宜今，呢款車喺香港唔算多，相信識貨嘅車迷見到都會望多兩眼。
卓妮聽聞Johnny嘅清水灣道大宅有多部名貴房車及跑車，但相信佢特別鍾意呢部仿古車，點解？因為佢打算下月結婚時用嚟做花車，佢仲話，唔排除稍後會買多一部喎，唔通想送畀未婚妻？
未婚妻身份好密實
不過，Johnny嘅未婚妻身份至今仍然冚得好密實，但卓妮聽聞女方屋企從事地產生意，雙方認識一年多，門當戶對，卓妮預先講聲恭喜！
卓妮