膠樽！我要膠樽！貧苦大眾要膠樽！
咦，咪住先，唔知係咪最近聽得「唐氏綜合症」以及睇得「唐生大地震」太多，受到語無倫次嘅唐英年感染，同時亦被佢狡辯為「擺放雜物」嘅僭建醜聞搞到莫名其妙，好多人連講說話都變得唔清唔楚。仲有呀，唐氏最新金句係「挑戰日日新鮮日日新」，聽完真係會感染到口齒不清㗎。
更正更正，功夫茶所講嘅「膠樽」其實係「交津」，交通津貼咁解。特區政府為咗鼓勵基層就業，推出交通津貼計劃。之不過呢一個計劃問題多多，受惠人數遠遠比預期為低。官方估計係咁嘅，四十三萬幾人合資格申請交津，接近二十二萬人會申請，三年總共花費四十八億元公帑。到頭來，呢一個估計大錯特錯，自從去年十月接受申請以來，直至今年一月中只有大約二萬五千人申請，唔夠二萬人獲批，比起預期幾乎少咗九成。
點解申請人數會少得咁交關嘅呢？好明顯，政府計錯數，呢家嘢應該係受到財爺曾俊華感染。其次，門檻太高，貧苦大眾跨唔過申請限制。喂，最低工資已經喺去年五月實施嘞，不少基層人士相繼加薪，入息上限設得太低就會令到好多人跌出交津受惠網。
勞工及福利局局長張建宗可能都認同唐唐金句「做男人要有膊頭、做公職要有腰骨」，所以身為公職男人嘅佢昨日宣布，放寬鼓勵就業交通津貼申請門檻，提高資產審查上限，調高至綜援限額嘅三倍，平均上調六成半。以一個六人家庭為例，資產上限調高至十九萬八千元。至於住戶入息限額，會參考二○一一年第四季嘅最新住戶入息數據，上調入息限額增幅平均超過一成，預計下月實施。
放寬申請門檻無疑係好事，但係對於貧苦大眾足唔足夠呢？計功夫茶話齋，不足不足，仍然不足，最大問題係規定必須以家庭資產審批申請，而唔係以個人名義作為申請單位。舉個例吖，一個六人家庭擁有二十萬元，剛剛超過資產上限，不過呢筆錢其實係老弱父母嘅棺材本，四個仔女無福消受，一貧如洗嘅佢哋想搵工又負擔唔起昂貴嘅交通費，咁點算好呢？你唔准佢哋以個人名義申請交通津貼，好不近人情啫！
家陣嘅交津金額係六百元，夠唔夠呢？咁講啦，窮人多數住得偏遠，路程一遠車費就貴，搭巴士一來一回都要二十幾三十元，畀完車錢隨時唔夠錢開飯，被迫食白粥度日都有之。
所以咯喎，如果張建宗真係有膊頭又有腰骨，唔該再檢討一下交津計劃啦。正所謂，為人為到底，送佛送到西，送佛嘅交通係要錢㗎！