特首參選人唐英年嘅九龍塘大宅僭建風波愈揭愈臭，一直被傳同唐唐不咬弦嘅發展局局長林鄭月娥，尋日強調當局會依法辦事，一視同仁，聲言會按程序優先跟進事件，尋日下午仲派隊人到唐宅視察，兼夾證實存在僭建，意味唐唐及作為業主嘅太太隨時觸犯刑責。林鄭今次擺出咁強硬嘅姿態，似足包青天準備用鍘處決犯人咁，唔知到佢決定要執法嘅時候，係咪依然咁強硬呢？
