不過，區議會選舉都過晒，點解呢幾位議員當初唔打正經濟動力牌頭出選呢？召集人林健鋒話好多市民聽到「政黨」兩個字已經擔驚受怕，覺得實無好嘢，所以先用獨立身份參選，當選後先慢慢蒲頭，咁就百利而無一害喎，唔怪得佢近排搞親活動都叫晒啲「樁腳」區議員出嚟啦。
警方指民記冇報案
講開鄉事派，我哋尋日爆料話有元朗鄉紳去信民建聯（民記）主席譚耀宗，不滿民記冇支持十八鄉鄉事委員會主席梁福元做元朗區議會副主席，事後呢位鄉紳話收到元朗警區重案組來電，指譚Sir報案話佢滋擾，仲約佢去警署見面。不過，元朗區班阿Sir就話感到莫名其妙，強調約呢位鄉紳去警署，同民記完全冇關喎。