政情：醫管局春茗豬油撈飯
醫院管理局經常教病人要食得健康，就少啲病痛，但新界西聯網總監盧志遠尋日搞嘅傳媒團拜，安排嘅食物真係嚇一跳。聯網喺「食神」梁文韜位於元朗嘅大榮華酒樓筵開三席，點選有新界特色嘅圍村菜，韜韜經常喺酒樓打躉，當然要出嚟介紹吓啲美食喇，但菜式除咗有雞、鴨、魚外，就連食得多好易有膽固醇嘅豬油撈飯都供應，認真唔健康。
不過，原來豬油撈飯係部分新界西醫生嘅童年集體回憶，佢哋話細路仔時代，阿媽會買舊肥豬肉炸油，再用啲豬油嚟撈飯，愈講愈有感情。
除咗豬油撈飯之外，圍村菜都有唔少特別之處，韜韜話，由於圍村菜係水鄉菜，所以會有一味魚，亦會用醬料，相對客家菜就冇魚，同埋食物多數係用鹽醃製烹調。
韜韜仲踢爆話，旗下九龍灣分店都有唔少熟客係公立醫院醫生，但就記唔清楚佢哋啲名，期間仲講錯前伊利沙伯醫院兒科顧問醫生吳彥明做吳彥祖添，好似做飲食節目搞笑娛賓咁。