特首參選人唐英年被揭發九龍塘大宅非法僭建豪華「地下行宮」，搞到屋宇署人員尋日上門視察及發出勸喻信。唐唐就話年犯太歲無運行啫，咁啱得咁蹺，佢嘅「紅酒密友」、麗新集團主席林建岳（肥仔岳），近期亦被一連串大字報「追殺」，大部分內容都係針對肥仔岳，唔知佢呢啲麻煩喺邊度嚟嘅呢？
其實上星期已發現有大字報嘅蹤影，點知尋日凌晨四點幾，又有市民目睹有人喺尖沙咀北京道、廣東道及天星碼頭一帶，張貼四十九張大字報，字裏行間耐人尋味，到咗尋日下午四點幾鐘，又有市民喺堅拿道西發現大字報。大字報以打印機列印，張貼喺電話亭、石柱及牆壁等，引來途人駐足觀看，無不竊竊私語。
大字報內容孰真孰假，真係要當事人至知。雖然肥仔岳已將大字報事件交由律師處理，但仍然不斷有人隨街張貼大字報，真係唔知點解。
不過，周街張貼咁多大字報，就要難為食環署工人幫手清理喇。