政情：怪醫 郭少明喜迎龍B
龍年喜事接踵而來，有「怪醫」之稱嘅醫學界立法會議員梁家騮尋日榮升做爸爸，梁太誕下五磅幾重嘅靚仔「騮Ｂ」，佢兩公婆相當開心。梁家騮笑笑口話，好多人都覺得BB好似佢咁成日皺起眉頭，又自爆同太太一齊入產房，但就覺得無乜特別，話可能因為自己係醫生喎。
梁家騮又透露，由於佢啲姪仔姓名中間個字係用個「裕」字，而今年又係龍年，所以都諗過幫BB改名做「裕龍」。不過，佢話有個醫生朋友都係叫「裕龍」，所以會盡快幫BB改過另一個名。至於會唔會追多個女湊成一個「好」字，佢就話太太啱啱先至生完，呢啲嘢都係遲啲先算喎。
同樣係有喜事嘅莎莎國際主席郭少明（Simon），佢大女郭詩慧亦臨盆在即，但究竟係龍仔定龍女，郭家上下都好口密，怕BB小器喎！尋日旅遊發展局及優質旅遊服務協會舉辦活動，副主席Simon掩不住就嚟升格做公公嘅喜悅，同好友交談時自爆屋企就嚟添個龍仔，眾人都戥佢開心。