政情：泛民內訌 扑濕鐵頭仁
民主黨主席何俊仁（鐵頭仁）號稱代表泛民主派參選特首，但事實上唔少泛民中人根本唔放佢在眼內。社區發展動力培育尋日公布一個特首參選人民望調查，鐵頭仁民望包尾唔算係新聞，但獲邀出席嘅社民連吳文遠及街工立法會議員梁耀忠就借機會狂踩鐵頭仁參選嘥氣，根本冇人騷佢。不過，同場白鴿黨單仲偕（𠜎雞）就批評兩人搞到個發布會好似鬧劇咁，結果三人鬼打鬼互片收場。
呢個民望調查訪問咗三百幾人，受訪者覺得選特首要睇參選人嘅「民意支持」及「個人能力」，過半數受訪者都認為特首參選人梁振英（CY）最適合做下屆特首。團體又比併各參選人政綱嘅八個範疇，CY幾乎全部遙遙領先，而鐵頭仁就喺「民主發展」方面佔有優勢。鐵頭仁民望唔掂，作為泛民一分子都應該打氣支持吓，但同樣係泛民嘅吳文遠同阿忠就踩多兩腳。
劏雞護主 輸打贏要
阿忠早已講明唔會喺小圈子選舉中投票，尋日去發布會仲遲到早退，而且對鐵頭仁冷嘲熱諷，成日話要提升市民嘅民主意識，但睇吓上次特首選舉邊個贏就知，而調查都見鐵頭仁嘅支持度較弱，阿忠咁講擺明寸鐵頭仁參選根本係嘥氣。吳文遠亦忍唔住批評，鐵頭仁日日批評唐、梁，就等於幫手營造到個選舉好似好有認受性咁。
劏雞聽到自己黨主席畀人咁樣踩法，即時面都黑晒，仲批評有關民調係遊戲，根本係個唔科學嘅調查喎。佢仲死撐話，泛民今次唔止夠票提名候選人，又成功搞咗初選，已經完成七、八成任務，又話喺初選投票嘅三萬幾人都係泛民支持者，如果依家唔參選，普選時未必動員到大家喎。
就係咁，成個民調發布會就變成佢哋泛民三人鬼打鬼嘅戰場，真係難為幫大會做主持嗰個，而劏雞為咗護主，連主人家個民調都踩埋，確係離譜。