中環出更：陳光明撈過界 投資有妙「髮」
曾經喺電台節目《窮富翁大作戰》中化身做天光墟小販執紙皮嘅陳光明（Johnny），本身開投資公司，但佢最近撈過界，喺中環開咗間樓上舖髮廊，仲吸引唔少模特兒、外國人及政商界嘅老友上門幫襯添。
唔少人問本身係skin hair（剷青）嘅Johnny，點解會做髮廊生意呢？佢話，做髮廊其實都係一項投資，反問：「男人都可以賣女裝，點解我唔可以開髮廊？」好多人都以為佢唔使打理頭髮，但其實剛剛相反，因為頭髮要長期保持一定嘅長度，係要畀其他人花更多時間去護理嘅，好似做吓scalp spa（頭皮護理）同按摩，差不多每星期就要上髮廊兩次，以修剪頭髮。
Johnny話，做髮廊就好似開藝術館一樣，每一位髮型師都落足心機為客人設計髮型，雖然佢唔識落手落腳剪，但就好鍾意睇住人哋剪髮，當見到客人臉帶滿意嘅笑容離開，叉足電再去返工，個人都零舍開心。
提供香檳修甲服務
為咗令顧客有非一般嘅享受，Johnny仲搞搞新意思，提供西班牙香檳畀客人享用，兼夾做埋修甲服務。其實依家都有男士去修甲，因為有啲係行政人員經常要交際應酬，少不免要同人握手，有一對滑淨嘅手，印象分都好啲啦。