中環出更：「台」風襲港 猛人開壇教通識
台灣文化氣流即將吹襲香江。台灣駐港機構台北經濟文化辦事處處長朱曦及光華新聞文化中心主任張曼娟，尋日下午齊現身光華嘅「立春以後，雨水之前」藝文春茗活動，用上中國節氣辦春茗，都幾詩意。張曼娟着上本地設計師LULU CHEUNG嘅粉紅色靚衫，力撐香港嘅誠意十足。
著名作家填詞人現身
張曼娟重點推介本月底登場嘅《台灣式言談》名人系列講座，講者粒粒皆星。其中兩場講座移師香港大學，變身通識教育題材，包括三月底由暢銷書《轉山》作者謝旺霖及編劇張家魯對談，謝旺霖係台灣知名年輕流浪者，佢本《轉山》記載自己騎單車由麗江到西藏嘅二千公里歷程，過程艱辛，勵志故事好值得時下年輕人借鏡。
至於四月底登場嘅作詞人方文山仲厲害，台灣天王歌手周杰倫唱紅半邊天嘅《菊花台》、《青花瓷》，古意盎然卻又任意穿梭時空嘅歌詞，正係佢嘅傑作，佢嘅歌詞仲經常成為兩岸學府考試試題添！捷足先登搶走兩位星級嘉賓嘅港大通識教育總監周偉立亦有現身，佢希望講座可以激發後生仔嘅夢想，唔好被現實生活磨蝕晒喎。
張曼娟又送上好消息，話港人遊台必到嘅誠品書店已選址銅鑼灣希慎廣場十樓，雖然首間分店唔係廿四小時營業，但相信都可以滿足到好多書迷嘅。
卓妮