市民鬧爆:「謊唐」特首仲有法治?

【本報訊】唐英年大宅僭建事件激起全城狠批,有市民指唐英年無誠信,質疑他一旦當上特首,日後政府處理僭建物時如何執法,又擔心香港失去法治,要求他盡快退出今屆特首選舉。及至昨晚唐英年夫婦見記者後,大量網民迅速發表回應,不滿唐英年將責任諉過於妻子。

聽眾黃先生致電電台節目,指唐英年無誠信,因為他涉嫌僭建,九龍塘昨日特別要封路三小時,又指唐英年感情缺失和僭建都顯示他有誠信問題,減紅酒稅更是對自己有利,總之唐英年就是「信唔過」的代名詞。

另一聽眾林小姐亦要求唐不要參選,她住在村屋,因為僭建被罰款八千元,她僭建的不過是六百呎地方,遠不及唐英年的大,她又質疑唐不知民間疾苦。

市民李太批評唐英年處理僭建物的態度,「如佢當選,日後政府處理僭建物點樣執法?市民會點睇?原居民想挖多一層係咪得?你都得,點解我唔得?」聽眾李先生認為,唐早前指需以和為貴處理新界僭建物,加上今次事件,他擔心唐統治下的香港將失去法治。

聽眾馮先生則批評他有錯不認,不配做特首,「香港需要一個果敢同有承擔嘅人做特首,如錯咗唔認仲要不斷補鑊,香港人會點睇?」有人更認為事件涉及虛假文件問題,紀律部門應主動插手跟進。

網上瘋傳惡搞圖片

網上瘋傳大量諷刺事件的加工圖片,極盡嘲諷的能事,亦很惹笑。及至晚上,網民不滿唐英年將僭建的責任推給妻子,網民jack1997指,「唐太真係好慘,男人個膊頭同條腰骨呢???」

CHARLIE008指唐「面皮厚到連參選資格都冇」。extrahi說:「佢唔退選,真係好戲在後頭,如果仲做埋特首,咁就要睇香港幾時暴動囉。」

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報