全國政協委員劉夢熊：唐英年話做男人要有膊頭，做公職要有腰骨，佢將件事推晒畀個老婆，係卸膊同縮骨，冇資格做特首。
工聯會會長鄭耀棠：唐英年起碼要交代清楚，事件涉及誠信係好大問題，我哋本來對提名有啲決定，但現時要押後啦。
工聯會副會長黃國健：要撐佢都幾難，今次唔只係僭建，仲涉及誠信問題，刑事問題，市民一定好唔鍾意，工聯會會密切注視。
自由黨榮譽主席田北俊：唐英年好多項疑慮仲未解釋，希望記者可以進入大宅視察，但從公眾利益角度出發，梁振英指西九漏報事件高層次好多。由唐英年自行決定使唔使退選。
自由黨主席劉健儀：投票同提名決定唔一定相同，自由黨會喺月底前開會商討事件，有新發展就要兩會後再決定。
民建聯副主席蔣麗芸：今次事件涉及誠信問題，事件一定影響唐英年民望，而民建聯一直重視民意，加上好多朋友都叫我哋重新審視提名，我哋會考慮呢個問題。但繼續落去，市民係咪仲信佢呢？
港區人大代表劉佩瓊：睇唔到唐英年有咩解釋，今次係好大件事，佢一定要講清講楚。
金融服務界議員詹培忠：今次都唔係僭建咁簡單，係誠信問題，距離特首選舉仲有咁多日，任何事都可以發生。
建築、測量及都市規劃界選委林雲峰：慎重考慮會否取回提名。非常重視參選人誠信，若證實涉及違法，不會再支持。
全國政協常委陳永棋：唐英年犯錯咪改正囉，好過死不認錯，現時佢誠信仲高啲，犯咗錯肯承擔，但一定會影響選情。