本港最後一個傳統粵劇場地新光戲院，下周日公演兩場粵劇後，正式收鑼。對一眾粵劇迷來說，難免有所失落，甚至痛心。
冇咗一個「粵劇殿堂」，惟有寄望西九文化區嘅戲曲中心，之不過西九計劃但聞樓梯響，至今西九依然係「北風捲地白草折」嘅爛地一塊！前政務司司長唐唐擔任西九管理局主席多年，其時佢有冇關心過粵劇呢種傳統文化嘅存亡？所謂推動文化藝術，佢又做咗啲乜嘢呢？
同文話齋：唐唐嘅政綱，一句講晒——就係人人有酒飲喇！抵死得嚟又到肉！公子哥兒至叻就係品紅及私藏紅酒，當然唔會好似曹操咁「對酒當歌，人生幾何，譬如朝露，去日苦多」。唐唐「命好」，屬龍，不是豬，乃稀有品種「龍豬」，愛課外活動，對酒當歌，回頭盡是風流快樂，人生譬如朝霞，來日喜多！一於飲勝！
一個人有冇文化，唔係好似上帝創世紀咁話有光就有光，要夜晚就有眾星；文化係要慢慢浸淫出來嘅！叫唐唐打造西九文化，設立乜都係廢噏，即使係「炒冷飯」，以佢嘅能力，一樣炒燶！然而，如果設立紅酒中心，推廣香港成為「紅酒港」，令人人有紅酒飲，連住劏房都可以度橋僭建酒窖，老朽就百分百相信唐唐必使命可達！
西九文化區——如果一早變成西九紅酒區，唐唐出任紅酒管理局主席，睇怕已車水馬龍、衣香鬢影，唔會於今腐草有流螢！