自稱對香港政治同傳媒運作唔清楚，先至搞出早洩民調大頭佛嘅浸會大學傳理學院前院長趙心樹，到依家仲潛緊水，聽聞佢成個人都殘晒，除咗早前請咗三星期假外，原來佢仲有成三個月大假未放，所以幾時先返工仲係未知之數。傳理學院依家群龍無首，校長陳新滋已展開招聘新院長，估計要半年時間招聘。
因應趙心樹唔熟悉香港嘅情況，所以陳校長仲打算新增一個副院長職位，由本港資深傳媒人坐鎮，憑住對傳媒運作瞭如指掌，知道點樣可以避重就輕，以後就唔會咁容易撞咁多板啦。
陳校長尋日同各大傳媒高層聚會，就趁機推銷呢個副院長職位，仲話無博士學位都唔係問題，事關要搵一個有博士學位嘅人唔難，但要搵一個縱橫傳媒界嘅人就難過登天喎。
陳校長似乎講得好輕鬆，如果真係由一個無番咁上下學術水平嘅人出任副院長，做到都難以服眾，甚至惹來外界批評，睇怕陳校長做任何決定前，都係考慮清楚先好啲喇。