政情：王國興力爭叮叮「加價」
有意循港島區直選嘅工聯會立法會議員王國興，近日非常關注港島事務，但睇嚟佢唔係好熟書。好似尋日佢喺立法會爭取將長者兩蚊乘車優惠延伸到電車，搞到勞工及福利局局長張建宗都唔知好嬲定好笑，反寸話如果王國興爭取到兩蚊優惠，長者就無得益喇！事關依家長者搭電車已經有一蚊優惠，阿王同當年陳克勤喺食肆全面禁煙後，仲問政府幾時落實食肆全面禁煙真係有得揮。
同王國興一樣開口夾着脷嘅仲有民主黨何俊仁，佢本來要質詢中港兩地自駕遊問題，但唔知點解佢睇住講稿問，都竟然讀咗運輸及房屋局局長鄭汝樺個答案出嚟，搞到鄭汝樺都唔知答唔答好，如果畀佢做咗特首都唔知點算。除咗議員甩轆瘀爆外，官員都唔好得去邊，食物及衞生局局長周一嶽答問題時走音，將「資深護士」讀成「資深護屍」，新正頭真係大吉利是。咁多人講錯嘢，莫非立法會毒氣攻心？