政情：剩女議員情人節養病
前日情人節個個都一雙一對，但被指「剩女」嘅立法會議員陳淑莊（Tanya），自前年同男友甩拖後，至今依然形單影隻，仲慘到要匿咗喺屋企養病。呢幾日Tanya喺立法會都戴住口罩，佢話因為上星期開始大感冒、發燒，就算喺屋企着晒厚衫、冚埋被，但一滴汗都流唔出，似乎病情好嚴重。不過，好彩佢仲識講笑，話睇嚟要裝番個平安鐘畀自己喎。
其實單身人士都可以慶祝情人節，但Tanya大病當中，所以前晚無慶祝活動，純粹留喺屋企休養，仲話二月十四、三月十四、定係七月十四，佢都係咁過日子，見佢咁豁達，相信大家可以放心。講開又講，Tanya早前為咗幫一個網站宣傳，化身成「Lady渣渣」，原來仲有下文，事關編劇正在撰寫下集故事，只要一寫好，佢又會再次變身，唔知下次會有乜嘢新搞作呢？