當日有份同譚Sir講數嘅十八鄉鄉紳報料，佢前日突然接到元朗警區重案組女警來電，對方講到明係譚Sir向警方投訴受到鄉民極度滋擾，所以要約佢去警署飲茶傾吓偈，了解事件嘅來龍去脈。呢位鄉紳收到電話後好驚訝，因為勢估唔到譚Sir竟然走去報警，仲覺得對方小題大做添。
我哋尋日直接向譚Sir查詢，佢承認上個月的確係同班鄉紳見過面，但強調氣氛正常，仲話自己絕對無就此事報警，亦冇聽聞其職員報警喎。呢件事雙方各執一詞，誰是誰非無從得知，但可以肯定嘅係，民記同鄉事派嘅關係唔多好，如果民記喺九月立法會選舉要鄉事派支持，睇嚟要修補吓啲關係喇。