中環出更：駕車北上名人嚇破膽
粵港私家車自駕遊政策鬧得滿城風雨，雖然夕陽政府喺首階段只准港人駕車北上，但係唔少政商界名人都有喺內地揸車嘅恐怖經歷，奉勸大家三思而後行。卓妮日前喺一個活動上見到前博愛醫院主席蕭炎坤同香港律師會會長何君堯，講起呢個話題，兩人北上駕車都遇過驚嚇指數爆晒燈嘅經驗。
蕭炎坤話，有一次喺東莞揸車途經一個十字路口時，一架內地車突然由小路衝出，位於大路上嘅佢煞車不及，最終兩車發生輕微碰撞。不過，嗰位鹵莽嘅內地司機有錯唔認，仲聲大夾惡索償幾千元，結果身在異鄉嘅蕭老闆只好花錢消災。佢仲話，內地人揸車唔慣睇倒後鏡，經常險象環生。
至於何君堯就喺高速公路上睇盡內地人嘅揸車百態，例如揸揸吓突然停低研究路況，或者行過龍後，隨意倒車甚至逆向行車，總之千奇百怪，但佢強調唔應該一味否定自駕遊，應經過理性溝通後至做決定喎。
黃進達把握商機
卓妮又喺另一活動見到康泰旅行社董事總經理黃進達（Jason），佢就睇好首階段自駕遊帶來嘅商機。Jason話，春節旅遊旺季過後，現正進入淡季，所以佢哋把握商機，研究推出自駕遊配套服務，包括代辦手續、預訂酒店及旅遊景點門票，甚至培訓領航員帶特色團出遊，例如攝影團等，時機成熟就會正式推出。
卓妮