熄燈，有好多目的。正常人家熄燈當然係為咗瞓個覺覺豬啦，如果係環保人士，熄燈就係為咗慳電，因為浪費電力係會大量排放廢氣嘅。你估個個都好似曾蔭權咁嘥電嘅咩，禮賓府日日夜夜燈火通明，每月電費居然高達二十萬元，簡直離晒大譜！
好嘞，功夫茶問問大家，賊佬熄燈又係為咗乜呢？答案好明顯啦，梗係為咗偷雞摸狗甚至殺人放火。既然係咁，政府家陣嘅做法就同賊佬無異，全線熄燈嘅用意係黑箱作業，等佢哋可以為所欲為，做乜都不必受到監察。
如果大家唔明白功夫茶講緊乜，咁就不如先講一講政府點樣扼殺公眾知情權。即係咁，以前新聞從業員透過警方、消防以及救護人員嘅傳統通訊系統聽取突發事件嘅第一時間消息，從而趕赴現場直擊報道。自從警方轉用新一代數碼通訊之後，「聽機」已經變得不可能，呢家嘢就等於熄燈，令到記者處於伸手不見五指嘅黑暗狀態。警方熄燈之後，消防又以同一方法熄燈，跟住輪到救護人員。
記者無法再聽機吖嘛，咁就惟有依靠政府主動發布消息。問題係，官方餵料速度又慢，質素又低，而且往往有政治考慮，完全無意保障新聞自由。好似二月一日咁吖，凌晨零時五分黃大仙有人暈倒，警方竟然延至當日下午六點三十六分先至公布，足足遲咗超過十八粒鐘。同日下午四點左右深水埗發生一宗高空墮物案，警方又延至五點半先至公布，記者趕到現場已經乜鬼都清理完畢，採訪工作梗係交白卷啦。
冇耐之前發生幾宗嚴重罪案，包括彩園邨保安被斬殺案，鴨脷洲街市強姦案，灣仔鬧市後巷強姦案，一律延誤公布，情況令人髮指，因為新聞自由陷於黑暗歲月！
所以話啫，政府嘅所作所為真係同賊佬無異。喂，正人君子從來唔會怕光明正大開燈辦事，只有宵小之徒先至恐懼見光即死。
如果你問發布消息有乜政治考慮，咁就不妨睇一睇梁振英漏報風波。臨近特首選戰白熱化，政府突然一反常態，好有效率咁發稿證實，參選人之一嘅梁振英十年前擔任西九龍填海區概念規劃比賽評審團成員，涉嫌漏報旗下公司同一間參賽公司有聯繫，令人懷疑有利益衝突。十年前唔講，十年後失驚無神爆大鑊，政治考慮無非打壓眼中釘。
想公開就公開，想拖延就拖延，甚至乎想隱瞞就隱瞞，你話嘞，政府係咪黑箱作業？原因無他嘅，作賊心虛嘛。
計功夫茶話齋，新聞自由必須維護到底，大家有必要眾志成城振臂一呼：還我知情權！