經歷一次又一次嘅打擊，○八年立法會選舉風頭一時無兩嘅社民連幾乎被洗倉，內部分裂加上舊年區議會選舉一鋪清袋、輸光所有議席後，社民連尋日正式重新上路，一向唔理黨務嘅立法會議員梁國雄（長毛、圖）接任該黨第四屆主席，以後要兼顧嘅事更多。
長毛一向搞開街頭運動，要求佢分心照顧黨務，外人睇認真格格不入，不過有時從政就係咁，好多情形下都唔係自己可以話事。以長毛嘅知名度同號召力，接任主席相信仲可以幫社民連頂落去，如果佢唔做，社民連隨時就此玩完。
除咗長毛外，上屆內務副主席吳文遠將會同外務副主席鄧徐中調位，吳文遠解釋，今次只係調番正個位，因為佢以往一直係處理外務較多。秘書長職位則由曾任立法會議員嘅元老麥國風接任，講經驗就夠晒，而引咎辭職嘅前主席陶君行，今次改選只係續任行政委員。
