政情：IT豪情人節唔敢送禮
聽日就係情人節，愛侶互送禮物唔慳得。立法會資訊科技界議員譚偉豪就拒絕送禮物氹老婆大人。何解咁無情趣？IT豪笑言，同太太一向講心唔講金，情人節「忽然熱情」，反而會令老婆誤會佢有「景轟」。
香港資訊科技及通訊界理事會日前喺尖沙咀御苑皇宴搞春茗，IT豪坐足全場，認真畀面。互聯網專業協會副會長洪為民（Witman）都買枱請好友共慶新春。
講起情人節，IT豪自爆「冧招」，就係整心形湯丸。原來佢自細學曉整花生湯丸，今年一於拉埋囝囝幫手，父子兵入廚，譚太想唔冧都幾難。
歐美經濟插水，IT行業都受影響。Witman話，唔少做金融機構生意嘅IT公司，首當其衝成為被cut對象。為求生存，部分香港IT人積極北上掘金。Witman話，香港人有創意，具國際視野，與內地IT人才相比，仍然好吃香。