政情：陳新滋快閃驚上鏡?!
浸大傳理學院實驗室「快閃」調查報告淨係做咗八日，但估唔到連校長陳新滋都做咗「快閃黨」，見記者即閃。新民黨副主席田北辰（Michael）當選荃灣區議員，佢嘅辦事處尋日開張大吉，同Michael分屬好友嘅陳新滋都有畀面撐場。但陳新滋一見到記者就發揮其「快閃」本色，連典禮都未開始就消失咗。唔知係咪怕畀人話佢博上鏡？
尋日出席嘅仲有發展局局長林鄭月娥同政制及內地事務局局長譚志源（Raymond）。林鄭話自己十幾年前已經同「公職王」Michael相識，又謙虛咁話自己雖然係民望最高嘅局長，但同經歷過選舉洗禮嘅新民黨主席葉劉淑儀同Michael相比仲係差一截喎。
新民黨手握六張選委票，葉劉就話仲未決定提名邊個參選，又話如果有人真係差少少唔夠票，新民黨好樂意協助喎。乜原來唐英年同梁振英都已經夠晒票，新民黨大拿拿六票都唔放在眼內？