政情：競爭法一鑊泡 Greg蘇「潛水」
商務及經濟發展局搞《競爭法》搞到兩面不討好，工商界同建制派反對唔在講，推出幾招剝晒牙之後，又到泛民黨派唔滿意。商務局今日就會公布條例中法定機構嘅豁免名單，備受爭議嘅貿易發展局將會得到豁免。中聯辦主任彭清華早幾日先講政府嚟緊有幾個重要議案要通過，其中包括《競爭法》，商務局（工商及旅遊科）常任秘書長黃灝玄亦四出拉票。唯獨身為局長嘅蘇錦樑（Greg）隱咗形唔知去咗邊。
Greg蘇呢個隱形局長搞《競爭法》搞到泛民、建制都唔滿意。新民黨葉劉淑儀就不嬲都唔贊成立《競爭法》，商界方面幾個商會至今都冇明確表態。泛民本來都支持立法嘅，但當局為咗氹掂建制派同商界，又推出幾招幫條例剝牙，搞到泛民條氣都唔係好順。依家當局真係兩面不是人。
中聯辦上星期宴請建制派立法會議員時，彭清華就提到，本港今年有幾個重要議案要喺立法會通過，又舉例話其中一個係《競爭法》，咁嘅提法好唔尋常，好明顯就係幫Greg蘇箍建制派嘅票，叫大家唔好搞咁多嘢啦。
海洋公園不獲豁免
至於泛民方面，佢哋一向都好關注《競爭法》中獲豁免嘅法定機構名單，而商務局今日就會公布呢份名單。據聞喺本港大約六百個法定機構之中，只有十幾個唔會納入名單，不必要受《競爭法》監管。當中爭議最大嘅貿發局、市區重建局、機場管理局、房委會同房協等將會免受《競爭法》監管，但係海洋公園就要受監管不獲豁免。我哋都問過海洋公園，佢哋就話冇意見喎。
搵黃灝玄執爛攤子
相信呢份名單一出，泛民一定更加不滿，所以最近黃灝玄都好頻撲，要四出約見傳媒同落足牙力游說泛民黨派。不過講開又講，咁富爭議嘅草案一直由Greg蘇擔大旗，但做到一鑊泡咁，搞唔掂就「潛水」，搵下屬出手幫佢搞掂就算！