中環出更：鄭錦鐘自駕遊 Hea玩東瀛
保良局副主席鄭錦鐘（Eric）過年期間同太太及仔女，一家四口飛去日本五日，自駕遊欣賞東瀛景色，又四圍試盡特色拉麵，仲喺伊豆暢飲啤酒，順便買咗幾支返香港慢慢歎，玩得好盡興。
擦拉麵浸溫泉歎啤酒
卓妮早幾日喺活動上見到Eric，佢興奮地分享日本之行。Eric話，呢次行程先去東京一間叫「一蘭」嘅拉麵店，佢形容舖頭入面每個座位都有木板相隔，等大家可以盡情將拉麵「雪」入口，拉麵師傅做好個麵，就會掀開客人面前塊竹簾，將熱辣辣嘅拉麵奉上。
接住Eric揸兩個半鐘頭車，去到溫泉之鄉伊豆，望住個海hea浸溫泉，又品嘗黑皮叉燒拉麵。Eric仲發現咗一隻獨特嘅啤酒，係用當地泉水釀製而成，有橙味、檸檬味同番薯味，Eric大讚好飲，仲買咗唔少返香港添。
Eric去年馬運亨通，近日佢又同友人夾份養咗隻團體馬「匯聚力量」，日前由法國運抵香港，佢專程「探班」兼用手機拍下愛駒踱步雄姿。至於另一隻愛駒「享耆成」近排狀態大勇，啱啱過去季度，輕鬆贏出三場頭馬，Eric已book好枱慶祝。
卓妮