中環出更：蔡李惠莉隨時家有囍事
龍年宜嫁娶，社交圈喜事排隊來。玩具大王蔡志明太太蔡李惠莉都話，準備好嫁女同娶新抱。佢笑言，千金蔡加怡同男友拍拖幾年，感情穩定，公子加讚亦有甜蜜女友汪圓圓，只待仔女開聲，馬上可以辦喜事。
城中名太尋日齊集九龍灣國際展貿中心，出席香港婦協春節聯歡會。年年包場請食飯嘅賭王何鴻燊，今年人無到，但禮照到。全場一百二十圍酒席，由佢同二太藍瓊纓贊助。
名人佳節鬥浪漫
由澳門度假返港嘅蔡太，盛裝打扮到賀。佢話，子女新春各自出門，大女加敏一家遊台灣，加讚去杜拜，佢同老公就過濠江輕鬆吓，蔡生仲喺賭場大發新年財添。
情人節眨眼就到，名太最恨嘅並非收鑽石，而係鮮花。合和主席胡應湘夫人胡郭秀萍話，老公年年送大束玫瑰，冧到極。
太子珠寶鐘錶主席鄧鉅明都送花氹太太開心，鄧太就回敬一煲靚湯，認真體貼。「美容教主」鄭明明亦同老公甜蜜蜜，一齊食燭光晚餐浪漫吓。
數難忘情人節，工業家蔣震千金蔣麗芸大爆往事，話說當年與仍是男友嘅梁海明首次度情人節，對方竟忘記book枱食飯，最後行到去政府大球場嘅餐廳先有位，認真搞笑。
卓妮