打假波、吹黑哨嘅醜聞大家見得多，但有人身兼兩職，又打假波又吹黑哨，你又見過未吖？見識吓喇，本港淫審處就係咁嘅怪胎嘞，既有行政權，又有司法權，結果淪為護淫急先鋒，醜聞十隻手指都數唔晒。
呢嗱，壹淫媒旗下刊物違反《淫褻及不雅物品管制條例》過百次，次次都獲輕輕放過。舊年壹淫媒推出免費《爽報》，出街首月已經有二十三件物品被淫審處評定為二級不雅物品，再創新紀錄。奇就奇在，當局不改護淫本色，有法不執，依家已經過咗四個月，竟然仲未有任何懲罰，由得淫媒繼續逍遙法外，繼續荼毒青少年。
講真，淫審制度千瘡百孔，問題根源就係淫審處角色混亂，既負責對影視處送檢物品進行評級嘅行政工作，又充當司法機構角色對有關物品正式定級。權力冇制衡，有乜法子唔出事吖。
香港號稱法治之區，三權分立，淫審處一身兼兩職十足怪胎，改革刻不容緩。唔止立法會強烈要求檢討及改革淫審處架構，連大律師公會亦促請當局研究同建立新嘅審查制度，甚至建議廢除淫審處添。
面對民情洶湧，港府扮晒魚蝦蟹，對淫審條例改革進行公眾諮詢。第一階段諮詢○九年結束，除咗決定將審裁員總人數由三百四十人增加到五百人，並將委任限期延長至九年，對淫審處兩權分家隻字不提。至於第二階段諮詢連時間表都冇，擺明係假諮詢！
學者宋立功就講得啱，當局玩緊拖字訣，擺明想將問題留畀下屆政府，一旦拖到立法會換屆，過往嘅諮詢結果便可能好似西九計劃咁要推倒重來。冇錯嘞，所謂改革根本得個講字，當局做騷咁做，無非想繼續放生淫媒，同埋繼續玩選擇性檢控嘅啫。
講到選擇性檢控，真係不提猶自可，一提把鬼火。最經典莫過於當年嘅Kelly Brook事件，刊登同一輯外國女星性感照，《東方日報》及《太陽報》被評為二級不雅復被罰款，爛果報則被評為一級非不雅，而喺香港有售嘅外國雜誌《NOW》冇遮冇掩，連送檢都慳番。同一輯相竟然有三種標準，如果話港英餘孽唔係選擇性針對東方報業，你信唔信吖？
政府靠得住，豬乸會上樹，旨意淫審處堵截不良資訊，等於搵個賊佬看守金庫，根本嘥氣。功夫茶想提醒當局，民意不可侮，民心不可欺，你哋一味縱淫護淫，遲早自作自受嘅咋。