政情：港台報錯數激化仇內
呢排中港兩地為咗內地孕婦衝急症室、北大教授孔慶東鬧香港人係狗等連串事件，已經令雙方矛盾愈嚟愈深，勢估唔到作為官台嘅香港電台竟然火上加油，話說佢哋前日下晝四點五十四分喺網上放咗段新聞，標題係「5.6萬非本地居民拖欠醫管局24億元」，查實正確嘅數字應該係二千四百萬元至啱，港台足足報大咗一百倍，相差兩個「0」。
有市民就向本報投訴，話雖然港台即日已經更正咗段新聞，但已經喺YAHOO等網站廣泛流傳，尋日仲搵到。其實作為傳媒，報新聞要準確唔在講，更何況港台今次真係錯得好離譜，亦都嚇親香港人，以為內地同胞又使咗我哋廿四億元，矛盾想唔加深都幾難！
廣播事務管理局發言人話尋日收到一宗投訴，而港台發言人就回應話，呢段新聞放咗上網唔夠十分鐘，絕對冇喺大氣電波中出現過，而同事喺發現錯誤後，已即時更正番，對於今次誤報對市民造成嘅不便表示歉意喎。