政情：性博士情信攻勢冧女
唔好睇有「性博士」之稱嘅吳敏倫教授平日開口埋口都講性，言論既大膽又出位，原來佢追女仔一樣用埋啲古老方法，想當年就係用寫情信呢招維繫異地戀，將現任老婆徐梅追到手，呢十五封情信幫兩人修成正果，四十年嚟一直相敬如賓，簡直係香港活生生嘅愛情經典。
話說當年徐梅定居喺漫天戰火嘅越南，吳敏倫就喺香港大學讀緊醫科，兩人由筆友關係開始，愛情嘅種子喺不知不覺中慢慢萌芽，雖然佢哋想見面可謂難過登天，但無阻愛火嘅燃燒，兩人通信咗半年之後，已經認定對方係一生至愛，三年後終於排除萬難喺香港結婚，期間只係見過兩次面咋。
吳敏倫教授同太太結婚四十年，至今恩愛如昔，愛情感覺更加有增無減，喺當今講求即食戀愛嘅香港，情侶、夫妻嗌交多過食飯，大家可以喺吳敏倫博士同太太嘅情信入面，搵到維繫愛情嘅關鍵，同伴侶締造良緣。