政情：王英偉遠離「早洩」困擾
浸會大學民調「早洩」事件，差啲就搞到呢個培訓咗唔少傳媒人才嘅老店名譽掃地，事件中一直有人懷疑學校，甚至校董會高層有介入事件，搞到浸大校董會主席王英偉（Wilfred）要出嚟嚴正澄清，總之就搞到好頭痕啦。
本身亦係藝術發展局主席嘅Wilfred，尋日應邀出席八和會館新春團拜，佢尋日到場後，即時同班嘉賓雞啄唔斷咁傾偈，全日笑容滿面，見到Wilfred心情靚，梗係上前同佢傾吓啦，誰知呢頭打完招呼，嗰頭佢又畀其他嘉賓捉住。
阿姐Tim霍團拜行西禮
Wilfred唔得閒，八和會館主席「阿姐」汪明荃亦不遑多讓，全日滿場飛同班嘉賓甚至「粉絲」傾偈影合照，只見阿姐尋日一身鮮紅色打扮，睇落相當醒神，雖然阿姐把聲沙沙哋，但仍然笑容可掬，態度友善，呢啲咪就係專業囉。佢見到立法會議員霍震霆（Tim），仲嚟個西式擁抱打招呼，兩個人好合拍。
