中環出更：胡曉明情人節合家歡
眨眼又到情人節，後生仔愛二人世界，但城中名人就將佳節變成「大眾情人節」。好似專資會會長胡曉明（Herman）咁，每年情人節都係「電梯大王」爸爸胡法光牛一之喜，即使撐枱腳慶祝，都會預埋爸爸、媽咪，今年胡爸爸八十八歲生日，可喜可賀。
專資會理事兼電台主持楊素珊（Susan），尋日喺灣仔Assaggio餐廳舉行雞尾酒會，慶祝節目邁向七周年。Susan人緣佳，專資會高層謝偉銓、黃偉雄、廠商會會長施榮懷（Irons）、副會長吳永嘉、煙花公司榮聲集團行政總裁陳柏楠及四洲集團太子女戴凱欣都嚟祝賀。
撞正老竇生日
情人節就到，名人都話早已訂晒枱。Herman笑言，佢同太太嘅情人節，永遠唔止兩個人，事關胡爸爸生日大過天，呢點Herman太太都好認同。今年，佢哋索性約埋細佬及弟婦，一家六口齊齊切蛋糕。
施榮懷都揀與眾同樂慶祝。佢上任會長後，飯局停不了，一班由前東華總理及主席組成嘅「東華好友」會，爭住喺情人節賀佢，事關Irons九十年代初曾任東華總理，佢接棒做「廠商會一哥」，東華人都顏面有光。為免冷落太太，Irons嫂會孖埋老公一齊出席。
菁英會主席洪為民都唔執輸，準備入廚炮製牛扒慰勞太太；吳永嘉就靜雞雞Book定高級餐廳，同太太食燭光晚餐，認真Sweet。
還未遇上真命天子嘅Susan，情人節約埋一眾好姊妹食飯，盡情大吃大喝。熱愛畫畫嘅佢，龍年將喺上海舉辦以環保為題嘅畫展，宣揚愛護地球訊息。
卓妮