婆羅洲猩猩孖Ｂ 今會市民
【本報訊】首對港產婆羅洲猩猩龍鳳胎「雲雲」及「華華」，今日起在香港動植物公園公開見市民。七個月大猩仔「雲雲」與猩女「華華」可愛逗趣，但成長路艱辛，至今未嘗母愛。首次懷孕的猩媽媽Raba因「湊仔」經驗不足，不懂餵奶，兩兄妹身體虛弱，公園無奈改由人工飼養，猩媽媽與子女關係至今仍生疏，園方長遠希望將兩兄妹交媽媽養育，骨肉團聚。
哥哥好動 妹妹恬靜
香港動植物公園去年七月八日首次成功繁殖婆羅洲猩猩，屬罕見龍鳳胎。現時，哥哥「雲雲」身形健碩，重五公斤，活潑好動；妹妹「華華」重四公斤，斯文恬靜。兩兄妹除飲奶外，亦愛吃香蕉等生果。康樂及文化事務署高級獸醫戴慶豐指，猩媽媽Raba生產後不懂照顧猩B，「淨係識攬到BB實一實，要飲奶都淨係識錫啖BB，我哋惟有幫媽媽打麻醉槍，帶走BB人工餵奶，華華當時更臍帶發炎，打抗生素後康復。」
與媽媽分開住生疏
園方嘗試將雲雲和華華交回Raba養育，但可能牠們分居多時變得生疏，Raba反常地不欲親近猩B，更爬上籠頂避開。園方現每一至兩周帶猩B見媽媽，每次均帶上Raba最喜愛生果，希望吸引饞嘴的她親近，重新接受猩B，本月一日她突破性地走近「聞」猩B。不過，戴慶豐指Raba完全接受猩B可能需時數年，「就算猩B不和媽媽住，都會住在旁邊，學習婆羅洲猩猩習性、技能。」該園經理譚安琪指，已向建築署物色合適籠舍，適當時讓兩兄妹居住。
市民可於每日上午十至十一時及下午二至三時，到公園內教育及展覽中心探訪一對猩BB。康文署指會控制參觀人流，又提醒市民須保持安靜及勿以閃光燈拍攝。