夕陽政府成事不足，敗事有餘，已經到咗匪夷所思嘅地步。好似鼓勵就業交通津貼計劃咁，聽落係威係勢，似模似樣，其實係雷聲大雨點小，姿勢多於實際。
顧名思義，所謂鼓勵就業交通津貼計劃，係為低收入人士而設，去年十月開始接受申請，當局聲稱有四十幾萬人合資格，估計會有二十幾萬人申請。但實情係，至今只有二萬五千人申請，獲批嘅更只得一萬六千人咁大把，佔當局估計申請人數唔夠一成，你話係咪得啖笑吖！
勞工及福利局局長張建宗仲死撐，話要繼續觀察一段時間喎。其實正如有人話齋，與其繼續觀察，不如放寬申請資格仲實際。
冇錯嘞，交津計劃之所以反應冷淡，唔係打工仔嫌錢腥，而係申請門檻太高，限制多多，令人望而卻步。呢個計劃嘅前身係○七年推出嘅「交通費支援計劃」，限四個偏遠地區嘅基層勞工申請，被人批評厚此薄彼，後來先至將計劃擴展至全港。點知當局阿茂整餅，推行新交津計劃後，申請者除咗照樣要經過嚴格嘅入息審查，仲改以家庭為單位，例如三人家庭每月入息上限為一萬三千元，只要超出少少，就算某家庭成員月入只得五千元，對唔住，一樣唔合資格申請！
好明顯，港府根本冇考慮到最低工資呢個因素。查實好多基層勞工正因為最低工資實施後，薪金有所上升而失去申請資格，當局矯枉過正，諸多設限，似刁難基層勞工多過鼓勵就業。更搞笑嘅係，為咗配合呢項計劃，當局專門設立一個辦事處，聘用咗二百八十幾名職員，每年薪酬支出高達四千幾萬元，簡直係妹仔大過主人婆。講到尾，當局推行鼓勵就業交通津貼計劃，原來係鼓勵自己友至真！
正所謂，解鈴還須繫鈴人，當局要鼓勵就業，其實除咗要適當放寬交津計劃嘅申請門檻，更加要諗辦法降低交通費，即係咁，如果本港交通費唔係咁貴，根本唔需要搞咁多嘢。係人都知，港府監管不力，任由公共交通工具予取予求，尤其係港鐵，年年賺大錢，年年照加價，港府身為大股東竟然坐視不理，搞到加風四起，基層勞工辛辛苦苦打工，到頭來為他人作嫁衣裳，交通費去咗一大橛，攞綜援都冇咁嬲喇！
所以話，只要港府有本事逼港鐵減票價，其他公共交通工具自然亦會跟隨，到時咯喎，交通費負擔減輕，鼓勵就業咪水到渠成囉。如果唔係，就算當局搞幾多交津計劃，都係嘥氣嘅啫，倒不如直接派錢扶貧好過！