公民黨（公文袋）去年畀建制派狂轟係外傭居港權案嘅幕後黑手，市民亦以選票向公文袋說不，依家社會開始熱議「雙非」孕婦來港產子問題，公文袋日前就發起街頭簽名運動，要求政府立即暫停「雙非」孕婦配額，企圖「洗底」。不過，一直狙擊該黨嘅愛護香港力量（愛港力）再度出擊，踢爆公文袋其實係「雙非」嘅始作俑者，又希望大家認清佢哋「賊喊捉賊」嘅偽善本領喎！
愛港力公關組尋日向各大傳媒發表以「公民黨『賊喊捉賊』」為標題嘅新聞稿，指公文袋嘅李志喜就係「雙非」始作俑者，又狠批公文袋一眾大狀有法不依，導致今日有大量「雙非」湧港衝閘產子，令港人嘅福利資源被無止境蠶食。
此外，愛港力又印製號外詳盡講解「雙非」嘅來龍去脈，短短三個多小時就收到六千個簽名，又要求公文袋認錯同向市民交代佢哋創黨至今做過嘅種種禍港惡行。話時話，公文袋面對愛港力嘅指控，如果唔想再次被選民唾棄，睇怕都要諗定點拆彈喇。