政情：張文光推馮偉華落火坑
早已決定放棄競逐連任立法會教育界議席嘅民主黨（白鴿黨）張文光，一早就部署栽培香港教育專業人員協會會長馮偉華做繼任人，仲想馮入黨參選。估唔到張文光呢個如意算盤真係打得響，唔單止喺年幾前成功令馮偉華坐正做教協會長，農曆新年前仲成功逼到馮加入白鴿黨，下一步好大機會循教育界參選進身立法會。一直對參選扭扭擰擰嘅馮偉華就暗示話：「我老婆仔女一直反對我參選，不過依家已經接受現實」。
馮偉華尋日喺傳媒聚會上公布，佢喺農曆新年前夕正式加入白鴿黨。不過，被問到係咪有意參選立法會時，佢又欲言又止，只係話未決定，但會積極考慮喎。
講番轉頭，其實馮偉華一直以來都唔係太想加入白鴿黨，點解突然又入咗黨呢？佢坦言：「由我做普選聯開始，已經有人游說我入黨，而張文光就係游說得最勁嗰個，當初仲部署叫我做教協副會長，去到做會長，再入黨……」。
佢接住又話，喺佢應承做教協會長時，都開始諗應唔應該加入白鴿黨，「以往我對入黨好猶豫，但見華叔（司徒華）和張文光動員好多盟友嘅票支持，令我明白日後如果要參政，入議會，係唔可以單打獨鬥，因為會好難、好吃力，到時黨友嘅支持好重要！」原來佢除咗要過到入黨呢個個人難關之外，馮偉華如果真係要參選立法會，仲要過埋老婆仔女嗰關。
馮太與子女焗接受現實
馮偉華笑笑口話：「我老婆仔女一直反對我參選，不過依家已經接受現實，因為覺得我反正參唔參選，都有咁多嘢搞，成日都唔喺屋企。」為咗分擔教協嘅職務，馮偉華除咗新聘請咗個助理外，仲新任命佢港大嘅舊同學葉建源做教協總幹事，似乎為參選立法會鋪定路。如果馮偉華真係參選，張文光就真係守得雲開見月明，可以全身引退，專心處理番教協會務，而馮就展開議員生「捱」喇！