中環出更：蔡冠深舉家 新春食盡台北
台灣珍珠奶茶曾經熱爆香江，到依家已變得冇乜特別，但親身去台灣飲又另計。話說中華總商會會長蔡冠深與太太蔡關穎琴及四位公子，趁新春期間暢遊台北，包括著名嘅九份、十分風景區及夜市，蔡太帶隊穿梭大街小巷，食到唔停得口，而且日日勁飲珍珠奶茶，結果肥咗幾磅返港。
蔡太掃柑桔養聲
卓妮日前喺中總新春團拜遇見蔡太，見佢容光煥發，去完旅行充電真係唔同啲，佢話喺當地食盡好嘢外，仲發現一款馳名台灣嘅柑桔，聽聞某紅歌星開騷前都食啲嚟養聲，蔡太閒來愛唱歌劇自娛，買番幾包潤喉就啱晒。
傾傾吓，卓妮發現蔡太左手尾指包上紗布，細問之下，原來尾指喺一年前開始長出肉粒，好似黃豆咁大，為免壓住手指神經線，及早喺過年前找醫生開刀切除，免除後患喎。